تۇركىستان وبلىسىنان رەسەيدىڭ ەكاتەرينبۋرگ قالاسىنا بەت العان «VAN HOOL» قوعامدىق كولىگىنىڭ جول بويىندا توقتاپ تۇرعانىن كولىك پارتۋل باتالونىنىڭ سەرجانتى سايات دۇيسەنبين جەتەكشىلىك ەتكەن توپ بايقاپ قالعان.
سويتسە, تاجىكستان مەن وزبەكستاننىڭ 54 ازاماتى بار اۆتوبۋس پەتروپاۆل قالاسىنا جەتە الماعان كۇيى ورتا جولدا بۇزىلعان. قاڭتاردىڭ سارشۇناق ايازىندا جەڭىل كيىنگەن شەتەلدىك جولاۋشىلارعا دەرەۋ كومەك كورسەتىلىپ, جاقىن ۇيلەرگە ورنالاستىرىلعان. اۆتوبۋس تەحنيكالىق جوندەۋ ستانساسىنا جەتكىزىلگەن.
اققايىڭ جانە تايىنشا اۋداندارىنىڭ ءتارتىپ ساقشىلارى دا ورتا جولدا بۇزىلىپ قالعان «Scania» اۆتوبۋسىنا جەدەل جەتىپ, كومەك قولىن ۇسىنعان. كولىكتە 15 ادام, ولاردىڭ 8-ءى بالالار بولعان. جولاۋشىلار تايىنشا كەنتىندە قوناق ۇيگە ورنالاستىرىلىپ, ىستىق تاماقپەن قامتاماسىز ەتىلگەن.
وبلىستىق جەرگىلىكتى پوليتسيا قىزمەتى باستىعىنىڭ ورىنباسارى ايدىن بايماتوۆتىڭ ايتۋىنشا, ۇسكىرىك سۋىقتاردا تراسسا بويىندا تاۋلىك بويى كەزەكشىلىك ۇيىمداستىرىلعان. الايدا ەسكەرتۋلەرگە قاراماستان جولاۋشىلاردىڭ جەڭىل-جەلپى كيىممەن شىعۋى, ال جۇرگىزۋشىلەردىڭ قاجەتتى كومەك, مەديتسينالىق قۇرال-جابدىقتارمەن شىقپايتىنى از كەزدەسپەيدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى